Qurʼonning har bir harfi o‘qilganida bandaga o‘nta savob berilishi haqida xabarlar kelgan. Bu vaʼdalar mo‘min bandaning Qurʼoni Karimni ko‘proq o‘qishi va ezgu ishlarga shoshilishi kerakligini anglatadi. Sababi, banda moddiy narsalarga qiziquvchan bo‘ladi. Unga moddiy manfaat vaʼda qilinib, keyin biron ishga buyurilsa, u o‘sha ishni bekam-ko‘st bajarishga harakat qiladi. Lekin mo‘min banda Qurʼonni faqat biror manfaat yo‘lida emas, balki Alloh roziligi uchun o‘qishi kerak. Shunda boshqa manfaatlar ham o‘z-o‘zidan kelaveradi.