Mashhur psixolog va ijodkor Jon Greyning “Erkaklar Mars, ayollar esa Venera sayyorasidan” nomli asari zamonamizning eng yaxshi xaridorgir kitoblaridan biridir. Mazkur asar juda ko‘plab odamlarning taqdirlari yaxshi tomonga o‘zgarishiga sabab bo‘lgan.

Erkak va ayollar o‘rtasida yuzaga kelayotgan juda ko‘p muammolar bizning haqiqatan ham turli dunyoqarashga ega insonlar ekanligimizdan dalolat beradi. Biz nafaqat har xil insonmiz, balki turli sayyoradan kelganmiz ham. Biz erkak va ayollarning ko‘p masalalarga yondashuvimiz shu darajada farq qiladiki, natijada, bir-birimizni chindan tushunishimiz uchun alohida umumiy muloqot tili kerak bo‘ladi. Biz aynan mana shu tilni o‘rganib olsak, muhabbat mojarolari, oila va ishda uchrayotgan ko‘p­lab kelishmovchiliklar barham topadi. Kitob 16 yoshdan katta barcha erkak va ayollar uchun mo‘ljallangan.

Yozuvchining “Osmondan tushgan bolalar” nomli asari esa ota-onalar uchun foydali asardir. Unda farzand tarbiyasi bilan bog‘liq muhim hayo­tiy maslahatlar, qimmatli fikrlar beriladi. Kitobni o‘qish davomida uni hayotga tatbiq etsangiz, ko‘plab yutuqlarga erishasiz. Ijodkorning ushbu kitoblari Siz azizlarga manzur bo‘ladi, degan umiddamiz.