Rasululloh sollallohu alayhi va sallamning so‘zlari, feʼl-atvorlari yoki taqrirlari, yaʼni biror sifatlarining ifodasi hadis yoki sunnat deyiladi. Asl eʼtibori bilan “hadis” va “sunnat” istilohlari muhaddislar o‘rtasida bir maʼnoda qo‘llanilib, hazrat Payg‘ambarimiz sollallohu alayhi va sallamning siyratlari, yaʼni hayot yo‘llarini anglatadi. Shunga qaramay, bu istilohlardan mushtarak jihatlar bilan birga o‘ziga xos farqli tomonlar ham borki, ko‘plab ixtiloflarning oldini olishda bu farqlani anglash va anglatishning ahamiyati ulkandir.